بالبلدي: في منتدى مصر.. 6 ملفات كنت أتمنى طرحها للنقاش

منتدى مصر اضاف لمسات ايجابية وأمر جميل نتمنى دوامه.. المنتدى تناول امورا كثيرة وحدثت به مناقشات متميزة مثمرة لكن انا كنت بتمنى اكون فيه كان نفسى اسأل اسئلة ممكن تفيد وممكن تفتح باب للمناقشة..  المنتدى اثبت للعالم ان مصر تقبل كافة الآراء.. وان مصر بلد الحرية والأمان.. كنت ح اسأل اقول ايه لو كنت فى منتدى مصر..

اولا: 

كنت ح اسأل وانا في منتدى مصر.. هل توجد لدينا خطة زمنية لتقليص حجم الأموال الساخنة.. ح تقولى اى اقتصاد فى العالم موجود به أموال ساخنة.. اقولك تمام.. لكن خروج الاموال الساخنة المفاجىء  بيسبب انخفاض فى قيمة العملة ده قد يكون بيأثر على التضخم وبالتالى الناس ح تتأثر.. الاموال الساخنة هى احد انواع الاستثمار لكن نتمنى عدم الوقوع فى مخاطرها..

ثانيا: 

قرار مضاعفة سعة باقة ٥٠ جيجا لتصبح ١٠٠ جيجا بنفس السعر امر مميز وشىء محترم.. لكن نتمنى زيادة سعة باقى الباقات وبنفس السعر.. ليه ؟ لو قلصت انفاق الناس على الإنترنت ح اوفر لبهم ميزانية للانفاق على جوانب اخرى ف السوق وح يحصل تتشيط للاقتصاد.. منتدى مصر

ثالثا: 

ح اسأل سؤال غريب شوية وانا في منتدى مصر.. طالما شركات الأسمنت والاسمدة بتصدر وتجيب دولار وبتربح أرباح بالمليارات.. ليه م تاخدش الدولة قرارها بالاتفاق معهم.. انهم من خلال حصيلة التصدير يساهموا بالعملة الصعبة فى سداد ثمن الغاز والطاقة التى تشغل مصانعهم.. ونبقى خففنا من على الدولة.. ولا كل حاجة مطلوب من الدولة توفيرها لوحدها وبس..

رابعا: 

كنت ح اسأل وزير التعليم ووزير المالية سؤال هام في منتدى مصر.. ليه مدير الادارة ووكيل الادارة والموجهين محرومين من حافز التدريس ؟ الموجه اللى بيشرف على ٤٠ معلم على الاقل  .. ليه لم يتم ادراجه فى حافز التدريس ؟ انا موجه اعدادى ليا ٤ شهور شغال شغل ٤ موجهين على الاقل.. ومفيش غيرى اعدادى ف ادارتى.. مين سأل فيا ؟ يا ريت نظرة رضا وتقدير للموجهين فى شأن حافز التدريس..

خامسا: 

كنت ح اطلب من سكك حديد مصر يدرسوا طلب للصعايدة.. محتاجين قطارات اضافية ف خط القاهرة اسوان أحدهم  الساعة ٤ صباحا من القاهرة بين مواعيد ٩٣٤ و١٠٠٦ مع احترامى لوجود قطارات بين المحافظات صباحا ( قطارات تحيا مصر ) وكذلك محتاجين قطار ينطلق السابعة او التاسعة والنصف مساء من سوهاج لتخفيف الضغط عن قطارات ١٠٠٧ و١٦٣ و١٠١٣.. والله اعلم لانها رؤية تقبل التأييد او الرفض..

سادسا: لو عايزين نوفر طاقة نتكلم عن ثلاث أشياء 

- تقليص الاحتفالات 
- فى مدارس الثانوى العام اغلاق اجهزة الراك لانها بتستهلك وكذلك اغلاق التكييفات الخاصة بها عقب انتهاء اليوم الدراسى 
- عقد الاجتماعات الصحفية للمسؤولين فى الأماكن المفتوحه بعيدا عن القاعات.. 
- ان يصبح يوم السبت اجازة لجميع المدارس بما فيها مدارس الفترتين.. 
- إقامة المباريات الرياضية ( كرة القدم )  نهارا فى شهور ديسمبر ويناير.. الجو شتاء والشمس ليس لها تأثير قوى مثل شهور الصيف..

واخيرا اقول.. يا ريت قيادات الدولة وسيادة الوزير يدعموا استقرار شباب المعلمين من الدفعات الخمسة فى الاستقرار الوظيفى الاجتماعى.. ليه بعض المديريات تقوم بتشغيلهم خارج اداراتهم بحجة ان العجز أشد رغم ان اداراتهم بها عجز يستوعبهم.. يا ريت سيادة الوزير من خلال مجلس الوزراء يتواصل مع السادة المحافظين ومن خلال الوزارة يجتمع بمديرى ووكلاء المديريات وينبه على عدم تشغيل اى معلم خارج ادارته طالما بها عجز..  الشباب المفروض احنا بنساعده على تكوين نفسه وليس انفاق مرتبه على المواصلات.. معلمات يتركوا بيوتهن واطفالهن من اذان الفجر علشان يوصلوا المدارس قبل السابعه او الثامنه صباحا.. الامر صعب على الشباب ماديا ومعنويا وبدنيا ولازم الدولة والوزارة يتدخلوا عاجلا فى هذا الشأن..