كشف الفنان مدحت تيخا، عن انتهاء أزمته المثارة مع المنتج عوض ماهر خلال الساعات القليلة المضاية، وذلك عقب تدخل نقيب المهن التمثيلية الدكتور أشرف زكي لحل أزمة الشيكات والمستحقات المتأخرة، عقب حصوله على الحكم ضده بالحبس لـ 6 أشهر.
وشارك مدحت تيخا، عبر حسابه الرسمي بموقع التواصل الاجتماعي «فيسبوك»، صورة تجمعهما بحضور الدكتور أشرف زكي، مشيرا إلى انتهاء أزمته مع المنتج عوض ماهر، قائلا: «بحمد الله وفضله ثم فضل الأب والضهر والسند بعد ربنا سبحانه وتعالى نقيبنا وأستاذي ودكتوري دكتور أشرف زكي تم الصلح بيني وبين المنتج عوض ماهر وتم دفع المبلغ المتبقي داخل النقابة بفضل الله ثم الدكتور أشرف زكي ربنا يحفظه ويخليه لينا جميعاً».
تفاصيل أزمة مدحت تيخا والمنتج عوض ماهر
وكان الفنان مدحت تيخا، كشف عن حكم المحكمة ضد المنتج عوض ماهر بالحبس لـ 6 أشهر على خلفية تحرير شيك بدون رصيد مؤخرا، مشيرا إلى أنه خاض الكثير من المحاولات لحل الأزمة في إطار من الود مع المنتج، لكنه قوبل بالتعنت.
وأوضح مدحت تيخا، عبر حسابه بموقع «فيسبوك»، تفاصيل أزمته، قائلا: «حق الرد على أزمة الشيك والمنتشرة خلال الأيام دي والنهاردة تحديدًا، أولًا الشيك ده بقاله 3 سنين، أنا صابر ومستني بقالي 3 سنين عشان أعرف آخذ حقي»
وتابع مدحت تيخا: «ومن شهر اكتشفت إن الشيك مدته هتسقط بعد أيام، فكلمت الأستاذ وقولتله لو سمحت اديني فلوسي، فقال مفيش فلوس كالعادة طبعًا على مدار 3 سنين، قولتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك تلات سنين كمان، يبقى أنا كدة مستني ست سنين، أظن أنا عداني العيب وأزح زي ما بيقولوا يعني»
وأضاف مدحت: «وأنا مكنتش مختار إن أنا أرفع قضية، أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوضت أمري لله وربنا موجود، ولكن أنا لجأت للقضاء عشان أضمن حقي وأضمن فلوسي اللي اشتغلت بيها، فأول ما أنا عملت كدة هو معجبوش، وفجأة أول ما عرف إن أنا رفعت قضية، شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كدة»
وأكمل: «واللي فوجئت بيه النهاردة وضايقني أوي على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد، أنا مش عارف هي بتعمل فيا كدة ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة؟».
وواصل تيخا: «أنا لجأت للقانون لإننا في دولة قانون، والحمد لله المحكمة حكمتلي، فأنا ده حكم محكمة، أنتم بتعترضوا على حكم المحكمة؟، أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟».
كما قال مدحت تيخا: «بدل ما تقفوا جنبي بتهاجموني مش عارف ليه، ولكن أنا اخترت إن كل اللي شتمني وكل اللي خاض في عرضي احتسبته عند ربنا ومسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي فـأنا مسامحك».
واختتم مدحت تيخا: «بشكر دكتور أشرف زكي لاحتواء الموقف، وبشكر شعبان سعيد محامي النقابة، وحبيت أوجه بس التوضيح ده للصحفيين ولكل الوسط الفني إن الشيك ده بقاله 3 سنوات وكنت مستني 3 كمان بس هو اللي مرضيش، عشان كدة لجأت للقضاء.. شكرًا».
اقرأ أيضاً
لـ 14 نوفمبر.. تأجيل محاكمة 42 متهمًا في قضية «داعش المرج»مهرجان الغردقة يناقش «تحديات الإنتاج السينمائي المستقل»
ريهام سعيد تهاجم طارق الشناوي ومحمد طاهر بسبب محمود عبد المغني.. ماذا حدث؟
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" الأسبوع "
