أزمة الطالبة ريم محمد صاحبة الـ4% في الثانوية العامة أشعلت مواقع التواصل الاجتماعي خلال الساعات الماضية بعدما خرجت طالبة الثانوية وكشفت تفاصيل أزمتها.

أزمة الطالبة ريم محمد صاحبة الـ4% في نتيجة الثانوية العامة 

وكشفت الطالبة ريم محمد أحمد، طالبة الثانوية العامة بمحافظة البحيرة، تفاصيل حصولها على نتيجة غير متوقعة فى امتحانات الثانوية العامة، مؤكدة أنها فوجئت بظهور مجموعها بنسبة 4% فقط، رغم أنها كانت من الطالبات المتفوقات طوال سنوات الدراسة.

الطالبة ريم محمد تروي تفاصيل حصولها على مجموع «4%» في الثانوية العامة 2026

وأضافت الطالبة ريم محمد أحمد خلال مداخلة هاتفية مع نهال طايل ببرنامج «تفاصيل»، والمذاع على قناة صدى البلد2، أنها فوجئت بظهور نتيجتها بمجموع 15 درجة من 320، أى بنسبة 4%، بعد أن كانت تتوقع الحصول على مجموع مرتفع نظرًا لمستواها الدراسى طوال العام.

وقالت ريم: «أنا مش عارفة إزاى ده اللى حصل، أنا كنت متوقعة نتيجة مختلفة تمامًا، لكن لما دخلت على الموقع ظهر لى فى البداية مجموع 92.4 من 100، ودا رابط صحباتى بعتوا ليا أول ما دخلت على الموقع ظهر الاسم والمجموع وعمل ريستارت وخرج، ولما حاولت أدخل مرة تانية مفتحش معايا».

وأضافت: «دخلت على مواقع كتير زى اليوم السابع وغيره، لكن مفيش حاجة فتحت معايا، لحد ما أصحابى وقرايبى قالولى إن النتيجة ظهرت وقالوا ليا أنا جايبة 15 من 320 يعنى 4%، وده شيء مش طبيعى، ودا مستحيل يكون مستوايا».

وأوضحت ريم أنها كانت من الطالبات المتفوقات فى الشهادة الإعدادية، قائلة: «أنا كنت الأولى فى الترم الأول فى 3 إعدادى، وجبت 138 من 142، وفى الترم الثانى جبت 172.5، يعنى كنت الرابعة على الدفعة بتاعتي».

وعن نتائج زملائها، قالت: «كل زمايلى الحمد لله جايبين مجاميع كويسة ومستواهم كويس جدًا، لكن النسبة للنتيجة بتاعتى أنا مسمعتش عنها قبل كده، أقل حاجة كنت بسمعها كانت 50% أو 40%، لكن 4% دى حاجة محصلتش خالص».

وأضافت: «ماما وبابا طبعًا منهارين، لأنهم كانوا شايفين تعبى طول السنة ومذاكرتى واجتهادى، وإحنا لسه بنتواصل وهنروح الإدارة وهنكلم المدرسين، وهنعمل تظلمات وكل الإجراءات اللازمة».

وأشارت إلى استغرابها من بعض درجات المواد، موضحة: «فى الدنيا كلها مفيش طالب يدخل الامتحان ويحصل على صفر فى مواد زى الفيزياء والكيمياء، حتى لو مش حل كويس أكيد هيكون فيه درجات، لكن إن حد يجيب صفر فى مادتين ده معناه إن فيه مشكلة، أو إنى ما حضرتش الامتحان، وده مستحيل لأنى مسجلة عندهم إنى حضرت كل الامتحانات، أو ورقتى حصل فيها مشكلة، وده برضو صعب لأن فيه مراقبين ومراجعة للبيانات والأوراق».

وأوضحت ريم أنها تطالب بمراجعة أوراقها، قائلة: «أنا محتاجة أشوف ورقى وأعرف إيه اللى حصل، وأشوف هل الدرجات دى فعلًا درجاتى ولا لأ، أنا كنت متوقعة أجيب فوق الـ90%، وحتى لو حصل أى ظرف كنت متوقعة أقل حاجة أكون 85%، لكن النتيجة دى حاجة مش طبيعية».

وأضافت: «حتى درجة الأحياء غريبة، جبت فيها نصف درجة من 60، والنصف ده فى البابل شيت مفيش، لأن السؤال الواحد بدرجة، فالنص درجة دى غريبة مع توزيع الدرجات، دى مستحيل تكون درجاتى، أنا محتاجة أشوف ورقى وأعرف اللى حصل، وأتعرف على الدرجات دى اتصححت إزاي».

التعليم تكشف سبب حصول الطالبة ريم محمد على 4% في الثانوية 

وكشف شادى زلطة، المتحدث الرسمى باسم وزارة التربية والتعليم والتعليم الفنى، تفاصيل مراجعة أوراق الطالبة ريم محمد أحمد محمود عبد الله، بعد شكواها من تغير نتيجتها فى الثانوية العامة من 92.4% إلى 4%.

وقال زلطة فى مداخلة هاتفية ببرنامج «يحدث فى مصر» عبر قناة MBC MASR، إن وزير التعليم استدعى أوراق الطالبة ريم محمد  لمراجعتها، موضحًا أنه بعد الفحص تبين أن إجابات الطالبة فى الأسئلة الخاصة بالاختيار من متعدد تضمنت اختيار إجابتين فى معظم الأسئلة.

وأضاف أن الوزارة أكدت سابقًا ضرورة اختيار إجابة واحدة فقط فى أسئلة الاختيار من متعدد، مشيرًا إلى أنه فى حالة وجود شك لدى الطالب فى إحدى الإجابات، يتم تظليل الإجابة المختارة واختيار إجابة أخرى، وهو ما لم تفعله الطالبة فى أغلب الأسئلة.

وحذر زلطة من المواقع والروابط الوهمية الخاصة بنتائج الثانوية العامة، مؤكدًا أن النتيجة الوحيدة المعتمدة هى الموجودة على موقع وزارة التربية والتعليم والتى صدرت بعد الاعتماد الرسمى للنتيجة.