belbalady.net مازالت الكلمة حائرة بين مفهوم لم يقصد ومقصود لم يفهم فاجعل كلمتك بسيطة حتى يفهم مقصدها.
فرصة لازم تنزل تشترى احتياجاتك
هى الفرصة دى بتيجى كل قد ايه افضل وقت فيه تخفيضات واللى نفسك فيه تجيبه احنا ما بنرضاش نجيب اللى نفسنا فيه الا لما يجى اليوم ده.
اللى من اسمه بيدل على الخير
اخذت الفلوس كلها ونزلت المول والفرحة والسعادة تغمرنى والمحلات بالخط العريض كاتبة على واجهتها اعلى نسبة خصومات على كل المعروضات
اللى كاتب ٥٠٪ واللى كاتب ٧٠٪ حاجه تفرح قلت اخذ جولة الأول عشان اشوف اللى يناسبنى والسعادة يا جماعة تملأ قلبى فى كل خطوة بخطوها.
لغاية لما لقيت محل فيه قميص تحفة نفسى فيه من زمان بس الظروف لم تسمح لغلو ثمنه ومكتوب عليه خصم ٥٠٪ فرحت فرحة كبيرة انا سعيد قوى يا جماعة القميص ب ٣٥٠٠٠ الف جنيه خمسة وثلاثون الف جنيه بس ايوه بجد
الحمد لله التخفيضات حقيقية.
دخلت شوفت مقاسى وبسرعة اخذته وقلت اجيب بنطلون مناسب والحمد لله لقيت اللون والشكل اللى عاوزه عارفين مكتوب عليه خصم خاص خذ واحد والثانى هدية فعلا اخذت واحد واعطانى الثانى هدية بجد عارفين بكام ٤٠٠٠٠ الف جنيه فقط اربعون الف جنيه فقط لاغير
تخيلوا يوم اسود جميل انا مبسوط قوى كده فاضل الجزمة والحزام وشراب ويبقى جبت الطقم.
دخلت محل شرابات قالى برضه هديلك واحد والثانى هدية والسعر مفاجاة ١٥٠٠٠ الف جنيه خمسة عشر الف جنيه الاسعار فعلا فرقت كتير ده قبل اليوم الاسود كانت الاسعار عالية جدا فرق فرق فعلا
اجيب الجزمة والحزام من محل كان نفسى اجيب منه وفعلا روحت لقيته حاطط يافطة كبيرة قوى على الاحذية تخيلوا الفردة الواحدة ب ٦٠٠٠٠ الف جنيه وتخيلوا والفردة الثانية هدية ودى كانت المفاجأة يا جماعة بجد.
اشتريت فردة والثانية هدية لازم تنزلوا يا جماعة قبل اليوم الاسود مايخلص الحزام لسه الحزام كان لازم من نفس المحل وبرضه عليه عرض تاخد واحد والتوكة هدية ٢٣٠٠٠ الف ثلاثة وعشرين الف جنيه فقط فقط يا جماعة.
جبت كل حاجة كان نفسى فيها طقم كامل ويابلاش ولسه باقى معايا فلوس لو كنت نزلت قبل كده شوفت بقى فايدة اليوم الاسود قلت اجيب حاجة حلوة وانا راجع تخفيضات تخفيضات والزحام شديد قطعة جاتوة ١٠٠٠٠ جنيه والدستة ١٢٠٠٠٠ الف جنيه ايه ده لازم اجيب دستة
يعنى التكلفة وصلت لحوالى ٣٥٠٠٠٠ الف جنيه ثلاثمائة وخمسون الف جنيه فقط بس يا جماعة تخيلوا انا سعيد فى يوم اسود بستناه كل سنة.
انا دلوقتى فى الرعاية المركزة بالمستشفى العام
جالى جلطة السعادة
افوق وارجع لكم
تحياتى ومن عندياتى.
قرمشة شعبيات.
جات الحزينة تفرح مالقيتش لها مطرح
ايش تاخد الريح من البلاط
القرش الابيض ينفع فى اليوم الاسود
القرعة تتعايق بشعر بنت اختها
ايش جاب الغراب لامه.
إلى اللقاء..
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" الفجر "
0 تعليق