تزامنًا مع ماراثون امتحانات الثانوية العامة لعام 2025، قدّم الدكتور محمود محمد علام، استشاري الإرشاد النفسي والأسري، من خلال "كشكول" نصائح نفسية مهمة للتعامل مع مادة الرياضيات البحتة، والتي تُعد واحدة من أكثر المواد التي تُسبب ضغطًا نفسيًا كبيرًا على الطلاب.

لماذا تُعد الرياضيات البحتة من المواد الضاغطة على الطلاب؟

أوضح الدكتور علام أن الرياضة البحتة من أكثر المواد التي تضغط على الطالب نفسيًا، ويرجع ذلك لسببين رئيسيين:

1. الوقت المتاح لحل الأسئلة ضيق جدًا مقارنة بطبيعة المسائل التي تحتاج إلى تفكير متسلسل وتركيز عالٍ.
2. في بعض اللحظات، قد يشعر الطالب فجأة أنه لا يفهم شيئًا رغم المذاكرة الجيدة، مما يُدخل العقل في حالة تجميد تُعرف بـ”شلل الأداء تحت الضغط”.

ولهذا، شدد الدكتور علام على أهمية الاستعداد النفسي إلى جانب التحضير الدراسي، وطرح مجموعة من الخطوات البسيطة التي تساعد الطلاب في خلق توازن نفسي وتخفيف التوتر.

1. درّب نفسك على تقبّل الفشل المؤقت
• مش لازم تحل من أول مرة.
• ومش شرط تفهم السؤال أول ما تقراه.
• لو وقفت في نقطة معينة، ما تفزعش.
• قول لنفسك: “أنا مش مطلوب مني أكون عبقري، أنا بس محتاج أكمل تفكيري.”
• الهدف مش الكمال، الهدف هو الحصول على أكبر عدد ممكن من الدرجات.

2. اعمل محاكاة لجو الامتحان قبلها بيومين
• اقعد في مكان هادي مع منبّه أو مؤقت.
• خصص ساعة ونصف أو ساعتين، وحل ورقة امتحان كاملة كأنك داخل اللجنة.
• لو ما حليتش نصها، ما تقلقش.
• الفكرة إنك تعرض نفسك للجو الحقيقي قبل الامتحان علشان تتجنب المفاجآت، وعلشان عقلك ما ينهارش تحت الضغط الحقيقي.

3. اتعلّم تقول “كفاية” في الوقت المناسب
• لو حسيت إنك متوتر ومخك “قفل” على سؤال، سيبه وعدّي للي بعده فورًا.
• مادة الرياضيات ما بترحمش اللي يضيع وقته في سؤال واحد.
• مش كل سؤال لازم يتجاوب بالكامل علشان تجيب درجة كويسة.
• الذكاء هنا إنك تستغل وقتك صح وتتحرك بسرعة لما توقف.

4. قبل اللجنة بساعتين.. راجع المضمون فقط
• ما تفتحش تمارين جديدة.
• راجع ورقة واحدة فيها القوانين أو الأفكار اللي كنت بتتلخبط فيها.
• اقعد في هدوء، وخلّي جسمك مرتاح.
• ما تتكلمش كتير، وما تشتتش نفسك بمذاكرة عشوائية.

وأخيرًا، شدد الدكتور علام على أهمية تحفيز النفس بشكل إيجابي قبل دخول اللجنة، قائلًا:“قول لنفسك بصوت مسموع: أنا مش داخل أجاوب كل حاجة، أنا داخل أتصرف بذكاء وأجمع درجات.”