الجمعة 24/مايو/2024 - 12:23 ص

حصل القاهرة 24 على التقرير الطبي المبدئي للسيدة منال حنفي، بعد تعرضها وصديقتها لحادث دهس على يد  الفنان عباس أبو الحسن، بمنطقة الشيخ زايد.

وكشف التقرير الطبي المبدئي للسيدة منال ضحية حادث دهس الفنان عباس أبو الحسن، أن السيدة حضرت إلى المستشفى وهي تعاني من كسر بالترقوة وشرخ في قاع الجمجمة، وكسور في الضلع الأيسر، والحوض،  وعظم الأنف وكدمات في الوجه، وأن الحالة غير مستقرة ولا يمكن استجوابها.

وقال فهد، نجل الضحية، في تصريحات لـ القاهرة 24، إن حالة والدته متدهورة للغاية، معلقا: والدتي في حالة صعبة.. بتفوق ويجيلها إغماء.

وأضاف نجل السيدة المصابة في حادث عباس أبو الحسن: محدش من وقت ما دخلوا المستشفى بص عليهم، وسابوا الحساب ومشيوا، والسيدة التانية المصابة صديقة والدتي وتوفيت إكلينيكًا.

 نجل مصابة في حادث عباس أبو الحسن: حطوهم في المستشفى ورموهم ومشيوا

وواصل: حطوهم في المستشفى ورموهم ومشيوا، المستشفى اللي دخلوا فيه بالشيخ زايد قعدنا من الساعة 7 لـ 4 الفجر مش لاقيين عناية مركزة لأهلنا، ووهمونا إنهم هياخدوهم لمستشفى خاص آخر، وفي الآخر نقلوهم لمستشفى تاني في المهندسين، علشان والدتي تعمل إشاعة على جسها لإن عندها كسر في الحوض وجسمها متدمر، محتاجة تتشال وتتنقل كل شوية علشان تعمل إشاعة، وده بيخلي الحالة تسوء بسبب التنقل، والحالة التانية مش قادرين يعملوا لها إشاعة علشان مفيش شيء مجهز في المستشفى هل ده منطقي؟.

وأردف: مش حقيقي إنهم حطوهم في رعاية على مستوى عالي، وحط 10 آلاف جنيه في حساب كل حالة، ومش طالب منه حاجة غير إن والدتي تقوم بالسلامة، ومش طالب حاجة من الدنيا، ومطلبناش تعويض ومش عاوزين إلا هما.

نجل الضحية: الفنان كان ماشي بسرعة جنونية والمنطقة للعبور 

واختتم موجهًا انتقاده لعباس أبو الحسن: والدتي مكانتش على المحور، هي كانت خارجة من شغلها من بنك الشيخ زايد اللي في مول أركان من قدام التمثال، والمكان ده فيه مطب مكانش فيه سرعة وكان ماشي بسرعة جنونية، والمنطقة مخصصة للعبور والناس كلها بتعدي منها، وإزاي حد ماشي على سرعة تلاتين هيخبط اتنين؟.