الثلاثاء 07/مايو/2024 - 11:02 م

أوضح محمد هاشم مدافع فريق الإسماعيلي، عن تفاصيل أزمته مع الدراويش بعد عدم مشاركته في التدريبات الجماعية خلال الفترة الماضية.

بيان مدافع الإسماعيلي

وكتب هاشم على موقع التواصل الاجتماعي إنستجرام: بسم الله الرحمن الرحيم، أولا انا مكنتش حابب اتكلم في الموضوع ده دلوقتي إلا لآخر الموسم لكن حبيت أوضح اللي حصل معايا، وأنا دايما بحترم نفسي وبحترم المكان اللي أنا فيه وخصوصا إن النادي الإسماعيلي له فضل عليا ومقدرش أنكر حاجة زي كدا وهوه اللي عملني.

وواصل هاشم: الحمد لله إني معملتش مشكلة مع أي حد ولا عمري تمردت وعمري ما اتأخرت عن تمرين أو ماتشات وأنا ليا فلوس فى النادي من موسمين، ولم افتعل مشكلة ولم اشتكي النادي لأن أنا من كباتن النادي ومعملتش زي اللعيبة ما بيعملوا. 

واستكمل: ثانيا تم إبلاغي من عماد سليمان من شهر يناير، أنه تم منعي عن التدريب بدون سبب وهذا ليس قانونيا وطبعا محبتش أخش في مشاكل مع النادي وكنت بحترم التدريب الانفرادي، ومتأخرتش عن تدريب ولا غيبت يوم، ثم تم إبلاغي من كابتن عماد سليمان وكابتن علي أبو جريشة إن أرجع التدريب مع الفريق بشرط إني أتنازل عن جزء من مستحقاتي وتم الاتفاق على كدا ونزلت التدريب تاني يوم. 

وأكمل: تم إبلاغي بعدم نزول التدريب إلا لما أمضي على التنازل وهذا ليس متفق عليه وللعلم إني اتفقت على إني أتنازل على الموسميين الماضيين وجزء من هذا الموسم، مع تنازل نسبة المشاركة وأخد الجزء المتبقي عند الإمضاء، وتم الاتفاق على هذا مع كابتن عماد سليمان وكابتن علي أبو جريشة، ثم تم إبلاغي بعد هذا الاتفاق إني أمضي على التنازل بدون أخد أي شي من المبلغ، طبعا كابتن عماد سليمان وكابتن علي أبو جريشة والوزير عبد المنعم عمارة والمهندس مدحت الورداني، تواصلوا معايا عشان أمضي على التنازل ولم أخد شي وأنا طبعا بحترمهم وهم كوادر كبيرة جدا وأنا واثق فيهم، لكن الحق حق أن يتبع وأنا مش زعلان لأن اللي كاتبه ربنا هيكون ودايما راضي بأي شيء وكله خير، ويشهد الله إني لم أكذب في حرف واحد وأنا حبيت أقول الكلام ده عشان الناس متخدش عني فكرة سيئة، وأنا دايما بحب أبقى مظلوم لأن أنا مسلم أمري لله.