belbalady.net نفى الفنان محمد عبد الوهاب، حفيد الفنان فريد شوقي، صحة ما تردد عن ادعاءات الشاب كريم الحو، متسابق برنامج "ذا فويس"، بأنه حفيد الفنان الراحل محمد فوزي، وقال: "الموضوع بمنتهى البساطة، أولا الشاب كريم ده ربنا يا رب يوفقه ويكرمه ويحصل له كل ما يتمناه بس بعيد عننا، احنا منعرفهوش ومش قريبنا، أنا نفسي محمد فوزي يبقى خال أمي لزق على طول وأخو جدتي خبط لزق.. مبقولش إن أنا حفيده، بقول يا إما أخو جدتي يا إما خال أمي، وكل الكلام ده مهم إنه يتعرف".
تصريحات محمد عبد الوهاب
وأضاف محمد عبد الوهاب في تصريح خاص لموقع "الفجر الفني" أن أي محاولة لنسبه لشخصية فنية كبيرة مثل محمد فوزي أو أي فنان آخر غير صحيحة، موضحًا: "لو طلع غنى حاجة مش كويسة هيتقال حفيد محمد فوزي، هو مش حفيده.. ربنا يوفقه بعيد عن اسم محمد فوزي، وبعدين انت حفيد محمد فوزي طالع تغنيلي اه لو لعبت يا زهر؟ مش تقليلا من الأستاذ أحمد شيبه على راسي من فوق.. أنا بعشق الشعبي طبعًا، لكن ده لون وده لون، انت بتقارن بمحمد فوزي ده تراث يا ابني، ده عنده أغاني كتير عظيمة".
وعلق محمد عبد الوهاب على التعليقات التي قالت إنه اعترف بذلك خجلًا من إحراج أحمد سعد: “مافيش حاجة اسمها اتحرج وأجيب لنفسي مصيبة، حتى لو ابن عم جدك دي عيلة تانية، فمافيش أي مشاكل..الولد موهوب مش قصدنا نأذيه، كان يقول قريبه من بعيد أو من نفس العيلة”.
واختتم محمد عبد الوهاب حديثه بتحذير كل من يحاول نسب نفسه لأسماء فنية كبيرة: “احنا النهاردة واحد يطلع يقول كلمة ٥ آلاف بني آدم ياخدها وراه.. هو بقى تريند عشان اسم محمد فوزي، اللي أنا أعرفه الفنان الحقيقي بنفسه، وكان لازم يتعرف إنه مش حفيده عشان محدش يجي بعد كده ينزل أي خبر ويقول إنه حفيده”.
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" الفجر "
0 تعليق