belbalady.net "كان من رابع المستحيلات إنى أحلق شعرى لكن عشان بحب أحمد العوضى حلقته"، هو ما قاله الطفل سعيد محمود الذى قام بدور أحمد العوضى فى طفولته بمسلسل حق عرب، وعن تجربته واختياره للدور قال الطفل سعيد لـ"اليوم السابع": "مسلسل حق عرب تجربة حلوة أوي بالنسبة لى وخصوصًا إنى من محبي النجم أحمد العوضي فلما تم اختيارى إنى أقوم بدوره وهو صغير فرحت أوى".
وأضاف: "أى دور بيجيلى حتي لو دور كبير كان صعب عليا أوافق إنى أحلق شعرى عشان الدور، وكتير كنت بعتذر بس المرة دي كانت مختلفة، كنت رايح أصور خلاص وبعد ما وصلت قرروا إنهم يحلقوا شعرى علي باب اللوكيشن وكان مطلوب إنى فى 5 دقايق بس شكلى يتغير، فى الأول كنت خايف لأنى بحب شعرى جدًا ولكن عشان نفسى أشارك فى المسلسل وافقت أحلقه، واللوك النهائى عجب الناس جدًا وكنت قريب من شخصية العوضى".
وتابع: "من أكثر المواقف الحلوة فى المسلسل إن فيه مشهد معين النص فيه اتغير تمامًا وقرروا إنى هقول حاجة تانية وعملت المشهد حلو وكنت برتجل معاهم وأستاذ رياض الخولى دور عليا مخصوص وقالى انت هتبقى ممثل جامد أوى يا سعيد و أستاذ أحمد العوضي قالى أنا مبسوط أوي بيك إنك عملت دور عرب حلو ".
واستكمل حديثه لـ "اليوم السابع": "أنا شاركت كمان فى المسلسل العظيم الحشاشين مع الأستاذ الكبير كريم عبد العزيز وعملت دور ابن حفار القبور ودى إضافة كبيرة ليا إن اسمى يتكتب فى مسلسل زى ده مع المخرج الكبير بيتر ميمي ، ده غير إن مسلسل الحشاشين تاريخي و مليان معلومات و حاجات لازم كلنا نهتم بيها ، التصوير كان عدد ساعاته كتير وتفاصيله أكتر لكن كنت مبسوط، انا كنت شقى شوية فى اللوكيشن وكان أستاذ بيتر ميمى طول التصوير ينادى ويقولى فين سعيد اللمض ".
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" اليوم السابع "
أخبار متعلقة :