​

بعد إعلان الفنان رامى جمال إصابته بمرض البهاق، تبنى العديد من العاملين فى مجال «الميك آب آرتست» حملات توعية وتضامن مع مرضى البهاق، ليقدموا لهم الدعم بطريقتهم الخاصة، حيث رسموا خطوطاً تجمع بين اللونين البنى والأبيض شبيهة بالبقع التى تظهر على بشرة مرضى البهاق، رافعين شعار «البهاق تميز وليس مرضاً».

"آية": ما عرفتش أعبَّر غير برسمه على وشّى

رسمت آية عادل، ميك آب آرتست، خطوطاً على بشرتها بأدوات المكياج، تضامناً مع مرضى البهاق: «ما عرفتش أعبّر عن دعمى لرامى جمال وللتنمر اللى بيتعرض له مرضى البهاق غير بمجال شغلى، عملته بالأدوات بتاعتى اللى باستخدمها ونزلتها على صحفتى وعملت منشن لرامى جمال عشان يشوفه».

تقدم «آية» دعماً كبيراً لمرضى البهاق عن طريق حملتها التوعوية بتغيير نظرة الناس الخاطئة عن مرضى البهاق: «المرض مش معدى والمريض كفاية عليه الابتلاء ونفسيته وخوف الناس منه بيسبب له أذى كبير».

«فكرت أعمل كده بسبب إصابة رامى جمال بالبهاق ولقيت إن ناس كتير جداً بتتنمر على الناس اللى عندها بهاق، مع إن شكلهم حلو، فعملت المكياج كنوع من التضامن معاهم»، كلمات قالتها بثينة سعيد، حيث قامت باستخدام أدواتها البسيطة فى رسم البهاق على بشرتها: «فكرت كتير فى طريقة أتضامن بيها مع مرضى البهاق، ولقيت دى الطريقة المتوفرة ليّا اللى أقدر من خلالها أقدم دعمى ليهم».

"زياد": الطريقة دى هتبان للناس أكتر

كان زياد إبراهيم، ميك آب آرتست، يعتقد أن الجميع يعلم أن البهاق ليس معدياً، لكنه فوجئ بأن معظم الناس لا تعلم شيئاً عن المرض، فقرر دعمهم والتوعية بالمرض بطريقته الخاصة: «قررت أتضامن مع المرضى بالطريقة دى عشان دى اللى هتبان للناس أكتر وعشان يشوفوا إن مفيش فرق فى الشكل وكلنا زى بعض ومفيش حد أحسن من حد». شعر «زياد» أن هذه الطريقة فى التوعية سيفهمها الناس أكثر، وستصل إليهم الفكرة بسرعة، فلم يتردد فى تطبيقها.