شغلت قضية وفاة الصيدلي ولاء زايد، والتي تحمل رقم 21739 لسنة 2022 جنايات قسم شرطة حلوان، والمقيدة برقم 48 لسنة 2022 الرأي العام، بعد اتهام زوجته و6 آخرين بالتعدي عليه، وإصابته بكدمات في وجهه، واحتجازه دون إرادته داخل شقة بحلوان، وعاقبت المحكمة أرملة المجني عليه رماء ووالدها، ومحمد.م، وعلي.ا، وعمرو.ا، بالسجن المشدد 15 عامًا، كما قضت بالسجن المشدد 10 سنوات  للمتهمين السادس والسابع، على خلفية اتهامهم بقضية مقتل ولاء زايد، صيدلي حلوان.

محاكمة المتهمين بقضية ولاء زايد صيدلي حلوان

وتنظر محكمة النقض غدًا الأحد، أولى جلسات الطعن المقدم من المتهمين، في قضية ولاء زايد صيدلي حلوان، على الأحكام الصادرة ضدهم.

وجاءت أقوال أرملة الصيدلي، ولاء زايد خلال التحقيقات كالآتي:

س- ما صلتك بالمتوفى؟

ج- هو جوزي.

س- منذ متى وأنتِ متزوجة من المتوفى؟

ج- أنا متجوزاه من 2016.

س- ما طبيعة عمل المتوفى؟

ج - كان بيشتغل صيدلي في المملكة العربية السعودية.

س- هل كنتِ تقيمين معه حال إقامته بالخارج؟

ج - أنا قعدت معاه من 2016 إلى 2019.

س- وما سبب عودتك لمدينة القاهرة؟

ج- أنا رجعت عشان ابني يونس كان كبر وأنا عندي شغل هنا.

س- وهل هناك خلافات بينكما؟

ج- ايوة، خلافات زوجية.

 خلافت أسرية بسبب الزوجة الثانية

س- وما طبيعة الخلافت الزوجية فيما بينكما؟

ج- خلافات زوجية، زي اللي بتحصل في كل البيوت، زي مصروف البيت.

س- ومتى بدأت الخلافات بينكما؟

ج- لما اكتشفت إنه اتجوز عليا.

س- وكيف اكتشفتِ زواجه بأخرى؟

ج- لما جه مصر وجالي يوم ۲۰۲۲/۹/۲۱ قالي إن هو اتجوز واحدة ثانية، وعرفت بعديها إن هو اتجوز من يوم ۲۰۲۲/۹/۱٦ وإنه كان على علاقة بواحدة من 4 أشهر.

س - ما أثرخبر زواجه عليكِ تحديدًا؟

ج- اتوجعت من اللي عمله، ورافضة إن أنا أكون زوجة تانية.

س- وهل دار حوار بينك وبين زوجك المتوفى في ذلك الشأن؟
ج- أيوة.

س- وما مضمون ذلك الحوار؟

ج- أنا قولتله هجيب بابايا ونقعد نحل القصة دي.

س- وهل قررتما يومًا معينًا لذلك اللقاء؟

ج- أيوة، كذا مرة حددنا مواعيد وهو كان بيخلف.

س- وما واقع عدم التزامه بتلك المواعيد عليكِ تحديدًا؟

ج- أنا كنت بحس إنه متردد في موضوع إنه يطلق التانية، وكنت حاسة إنه مش مقتنع بيها كزوجة.

س- وعلى ماذا اتفقتِ تحديدًا مع والدك؟

ج- أنا اتفقت مع أبويا إنه هييجي تاني يوم الواقعة، عشان يتكلم معاه ويشوفلنا حل في القصة دي.

س- وهل كان زوجك على علم بحضور والدك صباح يوم الواقعة؟
ج- أيوة.

س- ومن رافق والدك حال حضوره؟

ج - كان معاه أخواتي علي وعمر.

س- وما هو مستهل تقابلهم مع المتوفى؟

ج- هم قعدوا يتكلموا مع بعض واتفقوا إنه لازم يطلقني.

س- وعلامَ اتفقوا فيما بينهم؟

ج- ما اتفقوش والموضوع ابتدأ يتطور بينهم، لدرجة إنهم ابتدوا يشتموا بعض بألفاظ بذيئة ويضربوا بعض.

اشتباكات بالأيدي بين الضحية وأهل الزوجة

س- وكيف تعدوا بالضرب على بعضهم البعض تحديدا؟

ج- كانوا بيزقوا في بعض ولما ابتدوا يضربوا بعض، أخواتي ابتدوا يتدخلوا وضربوا ولاء عشان يدافعوا عن أبوهم، عشان اتزق قصادهم على الكنبة.

س- وهل شارك أحد آخر في الاشتباك؟

ج- مهاب جه وابتدأ برضه يزق ويسلك ما بينهم.

س- وما الفترة التي استغرقها الاشتباك فيما بينهم؟

ج - حوالي ربع ساعة لحد ما محمد. ع. جه.

س-  وما التصرف الذي بدر من المدعو محمد.ع حال وصوله؟

ج-  هو فض الدنيا ما بينهم وقال لهم نتكلم بهداوة.

س- وما مضمون الحديث الذي دار بينكم آنذاك؟

ج- محمد.ع  قعد يتكلم معانا عشان نهدي الدنيا، لغاية ما الدنيا هديت خالص وسیف جه.

س - وما الحالة النفسية التي كان عليها المتوفى حال حضور هؤلاء؟

ج- هو أكيد كان مخضوض من الموقف بس محدش عمله حاجة.

س- ما تعليلك بشأن وجود علاقة آثمة بينك وبين المتهم محمد. ع؟

ج- هو كان بيقولى بحبك على الواتس آب، وأنا كنت بقوله أنا ست متجوزة، وقفلت الموضوع ده.

س- وما قولك في ـن محمد. ع احتجز المتوفى؟

ج- الأوضة أصلا ملهاش مفتاح.

بسبب الشخص الثالث.. تفاصيل طلاق وقع بين الزوجين

س- وما قولك فيما قرره والدك بالتحقيقات أنه سبق وأن طلقك المتوفى.. فما سبب ذلك؟

ج- لأن أنا كنت على علاقة بواحد، وهو عرف فانفصلنا.. وعرف أهله بعد كدة رجعنا بعد 7 شهور.

س- ومن يكون ذلك الشخص تحديدا؟
ج- شخص اسمه محمود وكان فيه شات ما بينا على التليفون.

س- ما تعليلك لوجود المحادثة على هاتفك؟

ج- دي المحادثة اللى أنا اطلقت بسببها بعد كدة رجعت.

س- ما بادرة الحوار فيما بينكما؟

ج- إحنا كنا متفقين إن هو يطلقني ويديني حقوقي الشرعية.

ولاء زايد يستجيب لطلب زوجته الأولى

س- وكيف انتهى ذلك الاتفاق؟

ج- إحنا دخلنا في الأوضة واتكلمنا مع بعض شوية، ولما دخلنا اتكلمنا في حاجات زوجية، وقال لي إن أنا هطلق الزوجة الثانية.

س- وهل طلقها فعلا؟

ج- أيوة.

س- وكيف تم الطلاق؟

ج- هو كلمها في التليفون وقالها إنتي طالق.

س-  وما الذي حال دون تطليقها؟

ج- لأنها ساكنة في المنوفية، وكنت عايزاها تيجي عشان يطلقها دلوقتي.

س- وهل حضر أحد حلف اليمين؟

ج- هو طلقها قدامي أنا في التليفون، قالها إنتي طالق وهي سكتت وبعد كدة قالتله ماشي يا ولاء وقامت قافلة.

س- وما التصرف الذي بدر منكما عقب ذلك؟

ج- بعتنا نجيب أكل من برة، وكان معايا م ع ووالدي وولاء.

س- ومتى تحديدًا وصل الطعام؟

ج- بعديها بحوالي نص ساعة، وساعتها حصل مشكلة.

اختفاء مبلغ مالي من دولاب الزوجة

س- وما طبيعة المشكلة التي حدثت في أثناء حضور الطعام؟

ج- أنا جيت أحاسب ملقتش الفلوس في الدولاب.

س- وأین كنتي تحتفظين بالمبلغ المالي؟

ج- أنا كنت شايلاه تحت هدومي في دولابي.

س- وما قيمة المبلغ المالي تحديدًا؟

ج- هو 25 ألف جنيه.

س- ومن تحديدًا الذي سرق المبلغ المالي؟

ج- هو مفيش في البيت غيري أنا وولاء

س- وهل واجهتيه باختفاء المبلغ المالي؟

ج- أيوة.

س- وما الذي قرره لكي حال مواجهتك له؟

ج- هو قال لي أنا معرفش حاجة عن الفلوس.

س- وما أثر المواجهة عليه تحديدا؟

ج- إحنا قاعدنا بنزعق واتخانقنا مع بعض وصوتنا علي، وبعد كدة سألته أنت أخدت الفلوس؟ قالي لا وبعدها هدينا عشان أكل ابني.