الإثنين 06/مايو/2024 - 10:50 ص

كشفت تحقيقات النيابة العامة، تفاصيل جديدة في واقعة سرقة 5 ملايين جنيه من مواطن على يد 3 أشخاص بالاشتراك مع 5 آخرين، بعد أن حرضهم زوج والدة المجني عليه ومساعدتهم بالمعلومات اللازمة بحيازته المبلغ وإيداعها بأحد البنوك وانتحال صفة ضباط.

كواليس سرقة 5 ملايين جنيه من شخصين

ويواصل القاهرة 24، نشر نص التحقيقات في القضية التي حملت رقم 15375لسنة 2023 جنايات المعادي، حيث جاءت أقوال المتهم كالآتي: الاتفاق اللي دار بيني وبين سلامة كان يوم الثلاثاء الموافق 26/9/2023 وقتها كنت في البيت ولما تمسكت كنت لوحدي، وبسؤاله عن علاقته بالمجني عليهم قال أنا أعرفهم هما معايا في المنطقة وأعرف أبوهم، وسلامة وسيد أصحابي، واليوم اللي إحنا اتقابلنا فيه كان يوم الأربعاء والخميس، وبسؤال المتهم عن ظروف تقابله مع المتهم الهارب سلامة، قال: هو يوم الثلاثاء كلمني وقالي إن محمد.ع.ا، ابن مراته معاه فلوس وهيوديها تاني يوم هو وواحد صاحبه يحطوها في بنك وقالي إنه عايز يأخذ الفلوس دي، رديت عليه قلتله إني هكلم سيد يوسف وأشوف لو يعرف يتصرف.

وأضاف المتهم في أقواله أمام جهات التحقيق: کلمت سيد يوسف وحكيتله الموضوع قالي سيبها عليا وإحنا نأخد المليون جنيه قلتله هتعمل إيه قالي هكلم ضابط ومعاه الطبنجة بتاعته وهخليه يجيب رجالته ويجيبوا العيال يفتشوهم ويأخدو الفلوس، وساعتها أنا وافقت على كلامه وقلتله ماشي، والتنفيذ كان يوم الأربعاء الموافق ٢٠٢٣/٩/٢٧، وبسؤال المتهم كيف نمى إلى علمك قيامه بتنفيذ ما خططتهم له، قال: سلامة كلمني وقالي إنه نفذ فأنا كلمت سيد.ي، وقابلني وروحنا قهوة في المقطم واستنينا الرجالة اللي نفذت، وهناك لقيت عربية لونها رصاصي غامق من غير لوحات معدنية وزجاجها أسود متفیم ونزل منها واحد اسمه محمد.ا، وبيقول إنه ضابط في الجيش وواحد تاني ضخم وأسمراني وصابغ شعره أصفر وواحد تاني دقنه سوداء وشعره منكوش.

وتابع المتهم: بسؤاله عن مواصفات هؤلاء الأشخاص، قال: اللي اسمه محمد.ا، اللي بيقولوا عليه ضابط كان لابس تيشيرت وبنطلون جينز وكان بشنب كبير والتاني كان ضخم وطویل وشعره مصبوغ أصفر وواحد تاني دقنه سوداء، وكانوا بيقولوله يا جمال، وبسؤاله هل قمت بأخذ المبلغ المالي المتحصل من جريمة السرقة، قال أيوة سيد اداني الفلوس وأنا اديتهم لـ سلامة لما شوفته يوم الخميس، بس أنا معرفش الفلوس اللي تحصلوا عليها الناس اللي نفذت الواقعة، عشان أنا معدتش الفلوس، والمبلغ اللي أخذه سيد لنصيبه كان خمس روزم معرفش كام بالضبط، وزي ما قلت لحضرتك أنا قابلت سلامة يوم الأربعاء والخميس.