belbalady.net استعرض الإعلامى محمود سعد من خلال برنامج "sold out" المذاع على قناة Cbc، والذى يعرض على منصة Watch it الرقمية، قصة "فرح" فتاة مصرية مكافحة من منطقة المعصرة، حيث التقى بها أثناء عملها في محل مخبوزات وقيامها بإعداد الخبز.

وعن بدايتها مع هذا العمل الشاق قالت فرح: "من صغرى كنت باجى من الحضانة على المحل، وجدتى كانت بتعلمنى، واحنا بقالنا هنا اكتر من 40 سنة، وجدى كان صاحب المحل وجدتى عاشت معاه وهى حاليا فاتحة محل آخر وما زالت تعمل فيه بنفسها".

وتابعت فرح: "احنا 5 بنات وولد، والمحل ده أنا واختى بنشتغل فيه، وأنا خريجة نظم ومعلومات ولكن مشتغلتش كان نفسى لكن انا بحب شغلى ده اوى ومش هاعرف أعمل حاجة مش بحبها، ووالدى فاتح محل تانى، وأنا اتعلمت من والدى كل حاجة".

وأضافت فرح: "أنا نفسى أفتح مصنع كبير، وليا اخواتى الصغيرين مش عوزاهم يتمرمطوا مثلى، لأن انا اتبهدلت من الشارع والتعامل مع الناس لأننا في منطقة شعبية ولكن الموضوع مش اختيار من صغرك".

واستكملت فرح: "أنا مخطوبة وخطيبى فاتح محل ملابس، وبيشجعنى على تحقيق حلمى وانى افتح المصنع ولأنه كمان حلم جدي الله يرحمه".

وعن عدم عمل أحد معها بالمحل قالت فرح: "إخواتى أولى بالفلوس لأنهم في مدارس ودروس، وكلنا بنشتغل وبنساهم في مصاريف البيت"، وتابعت باكية: "عندى أختى مكة 5 سنين، بتيجى من الحضانة تبيع، وأنا مش عاوزة ده يحصل لإنى مش عوزاها تتعب زيى، وانا عاوزة أأجل زواجى عشان مش عاوزة أكون أنا في البيت واخواتى في الشارع".