belbalady.net
زى ما كنا زمان بننادى
وبصوت عالى نقول يا بلادى
وسط الحوش
على أرض سخية
توهب قلب عطوف وحنون
تزرع علم وتحصد نور
نرجع تانى ننادى عليكى
عايزين دايما نور لياليكى
شمس بتحرق قلب حسود
تبنى تعلى جسور وحدود
تمنع أى عدو غرور
يبعد عنك نور لياليكى
وزى ما كنا زمان بننادى
وبصوت عالى نقول يا بلادى
بنده تانى فى وسط زحام
فى قلب ضلام
إنتى يا بلدى يا حرة يا مصر
إنتى حياه منقوشه فى كفى
يوم ماتكون أنا فيها هاكون
إبن وعايش وسط إخواته
بس بلاش الوقت يعود
لزمان فات من وقت قليل (زمن الذل والمهانة قبل 23 يوليو)
لزمن عدت فيه الناس
بحر الذل لبحر نعيم
وزى ما كنا زمان بنادى
وبصوت عالى نقول يا بلادى
بسأل عنك كل الناس
بسأل عطفك فين ودوه
يمكن تايه وسط الخوف؟
وجايز عايز نسأل عنه؟
هسأل عنه أديب فنان
حكايات فنه كتاب محفوظ
واسأل عنه فى قلب مناضل
عرف الحق وجاب الخير
وأسأل عنه فى بيت الشاعر
اللى فى ليلك بات محبوس
وأرجع تانى وأنادى عليكى
هو أكيد الحلم الغالى ___ ( حلم توحيد العرب )
لما متمش غطى عليه
وعشان كده برجع يا بلادى
وبصوت عالى عليكى أنادى
فكى لجامك على الصوت
خلى شبابك يحى الموت
أصله عشانك مهما كان
باوهب عمرى عشان أحييه
وإن كان عمرى قليل على حلمك
هاكتب حبك جوه كتاب
يقراه غيرى وعمرى يطوووول
وقبل ما أفوتك جوه كتابى
وقفى غيرى فى وسط الحوش
علشان يرجع زى زمان
زى ما كنت عليكى بنادى
وبصوت عالى هيقول يا بلادى
عصام محمود السيد
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
المصدر :" اليوم السابع "
0 تعليق